EHLÊ ĞÎRET, BIGRE ŞÎRET

Article

 

 

Gelî ehlê bi ğîretê, wun guh bidin vê şîretê

 

 

Însan bi qedr û-b aqile, weka durra nav kakile

 

Li ba Xweda qedrê însan nayê gotin b-dev û ziman

 

Bi şeref û pir hêja ye, lew eşrefê mexlûqa ye

 

Lê ger Xweda bike jibîr, şîretê Wî neyne dibîr

Dûr dibe j-qedr û şerefê, perîşane l- çar terefê

Poşîmane xax û sosret, hizûr jê re dibe hesret

Davêjin der kul û keder, dihilmijin kerb û keser

 

Bav û kala, ap û xala, ev çend dem û dewr û sala

Bi ğîret û xweş galgala, dewla wan qet nema vala

Şîret dane bi şan mane, dîn û namûs sermîyan e

Em jî bibin li ser îman, bextewarê her dû cîhan

 

Heyat weka li seferê, l-çol û çîya deşt û gerê

Geh ser rez û ser mehserê, geh ser bexçe û bênderê

Bizanibe li her derê, ev kar naçe tu seferê

Feqet ‘emel bi qederê, diçe hîsab û mehşerê

 

Gelî bajarîw gundîya, zaryê çîya û deştîya

Ey paleyên ser zeviya, li ser erda, ser avîya!

D-karê pincarê kaniya, li ser tevnê bi teşîya!

Selam li we merheba j-wer, bidin pey rêya pêxember

 

Gelî bira gelî pismam, dêyû bav û xuşk û dotmam

Xal û xaltîk, metik û mam, gedew zarok, jin û zilam!

Biçûk mezin, ciwan û pîr, xwedî xatir ehlê ‘eşîr

Tev zanibin xatirê hev, dunya ev e çend roj û şev


Ey dengbêj û hozanê jîr; mêrê l-deşt û zozan wek mîr

Bav û bapîr, xwedî ‘eşîr, çi dewlemend û çi feqîr!

Hesab heye nekin jibîr, qebr û sûal Munker Nekîr

Li ser dinyê nebin hêsîr, axret heye eya wezîr

 

Kesê li sûk û ‘eresê, siwarê hesp û feresê

Ehlê mal û ber dergûşê, li bêrîyê pez didoşê!

Ey mervên li ser boraqê, dew diklê dike toraqê

Kar û qezenca helalî, bikin meslek bi delalî

 

Gelî dost û hem kirîba, heval û nas û ğerîba

Ji dûr û nêz, merv û cîran; rêwîw mêvan, hem me’zûban

Gelî cotkar û karkera, dozvan û azadperwera

Em tev guh bidin pêxember, ew e her tim ji mer rehber

 

Gelî guhdar û însana, ey xwedyê soz û ûjdana!

Lo welatlîyû omîdno, ser û maqûl û camêrno!

Ehlê civat û hazira, mehellîyû muhacira

Em j-ummeta Muhemmed in, ser navê Wî bi eşhed in

 

Bila qisse nebe dirêj, wun jî pê re nebin sergêj

Li dost û mervan bipirsin, li ser heqqyê qet netirsin

Cirr û bazaran xweş bikin, dost û dilxwazan geş bikin

Soz û dewran a mêraye, j-bo Xwedê ya camêraye

 

Îslam namûs û ğîret e, şerefa dinyaw axret e

Azadî her bi Xweda ye, bi rêya pêxembera ye

De kam di pey, peyv û kelam, ji dil bînin selat selam

L-Mûhemmedê serok rêzan, pêxemberê axir zeman

Di debarê nivîskar de

Têhev

28

Gotar

Ê Berê Klasîka Medreseyê û Elcewahîrur Reşadîye
Ê Li Pey

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.