SANDUQA NEXŞİN

Article

Wextêk kışta yo gem dı dewêka qıc bibi. Ina dew zaf zergun u şên bi. Kışta dew
dı miyanê gem dı yo bano darın bıbı. Ino keye dı merdımêko zerrnerm u dest akerde
cuyayên.
Heme dewıcan ıno merdımo zerrnerm u zanayi ra zaf hes kerdên. Gure u ihtiyaciya
kami bıbên ıno merdım cı rê biyên derman. Çı wext miyanê dew dı pêrodayiş u şer
bıbên, merdımo emırber dêstır resayên cı u benateyê inan vıraştên.
Roc bı roc ıno merdım teqet ra kuweno, beno kal u extiyar. Kar u gure ra kuweno,
destê ey hıni wuye u zengene nêdepışên.
Mergê ciniya xu ra dıma hewıliyeno keyeyê lacê xu. Xu bı xu vano, ez ınê serranê
xu yê peyinan lac u veyva xu het dı bıviyarni; labelê veyva ey zaf bêar u bêhurmet bi.
Zaf qalkerdên, her roc ciranan u dewıcanê xu dı lec kerdên.
Vıstoreyê ay çendêk bı rehm bo u cı rê holi bıkero zi ına veyv tı ra hes nêkerdên.
Wer cı nêdayên, cılê ey nêşıtên, mıqatê ey nêkotên. Tımotım ey het dı fekbazi kerdên
u cı ra ecızi kerdên.
Tımotım mêrdeyê xu dır semedê vıstoreyê xu munaqeşe kerdên. Vatên ıno merdım
ame nêame keyeyê ma, rızqê ma bıriya. Inê merdımi nanê sıfreyê ma kêm kerd. Nê
destê ey ra yo kar yeno nê zi faydeyê ey ma rê esto. Ez hıni ecız biya, ez zaf rencan
biya. Ya babiyê xu ra fek veradı ya zi mı ra.
Lacê merdımi tesirê ciniya xu dı maneno. Şıno miyanê gem dı çend daran bırneno
u ano keye. Miyanê çend rocan dı sandıqêka nexşin u gırd vırazeno.
Lac xu bı xu vano, ez babiyê xu bıxapini, bıerzi zerreyê ına sandıq u kendal ra lêr
bıkeri.
Lac zerreyê çend rocan dı sandıq qedineno u veng dano babiyê xu:
-Bawo! De bê teber.
Babiyê ey yeno teber. Lac, sandıq mocneno cı u vano:
-Bawo ına sandıq mı vıraşta. Weşê tu şi?
-Ê lacê mı, zaf gırd u zıxm êsena.
-Bawo! Eg tı wazeni ez tu pê ına sandıq bıçarni, wa bınêk keyfê tu biyero.
Babiyê ey qebul keno u kuweno zerreyê sandıq.
Lac, sandıq nano peru u hetê koyi ser şıno. Ko dı şıno serê yo zınari u sandıq xu
paşt ra ano war. Dıma sandıq dano wera beno leweyê zınari. Lac niyet keno sandıq
tan bıdo, a wext babiyê ey dano sandıq ru. Lacê ey qapaxê sandıq akeno.
Babi oniyeno lacê xu ra, peşmıriyeno, zertal beno u vano:
-Lacê mı, ez hol zano tı mı tiya ra lêr keni. Ez wazeno tu ra kelimeyêka şireti vaci.
Lac şeqıziyeno u sareyê xu erzeno xu ver. Goştariya babiyê xu keno. Babiyê ey
vano:
-Lacê mı! Tı eşkeni mı tiya ra bışeqıtni; labelê ına sandıqa nexşin heyf meker. Ina
sandıq weradı. Çunki ına sandıq yo roc qıcanê tu rê zi lazım bena.
Xu vir ra meker! Tı çı bıkeri, tı ê vineni.

Di debarê nivîskar de

Têhev

10

Gotar

Ê Berê TI BAWERI KENI
Ê Li Pey

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.