JI SÎYERA PÊXEMBER

Article

 

Resûlûllah çel salê xwe temam kir
Rebbê ‘alem tenêbûn pê şêrîn kir

Li çiyayê diçû Hîra şikeftê
Nêzî Mekkî ew kir bû wek mizgeftê

Gelek şeva dima tenê ew li wir
Li şikeftê wî 'îbadet her dikir

Ji Hîrayê nûrek taybet pir bi şewq
Li cîhanê tev belabû mislê berq

Bû pêxember ew Hebîbê Mustefa
Ji mer anî ‘edalet û hem wefa

Cebraîlê mubarek go bixwîne
Resûlûllah go xwendinam qet nîne

Cebraîl got bi navê wî bixwîne
Ew Xwedayê afirandî ins cinne

Tim bi navê wî Xwedayê afirand
Cinn û însan bejn û balê fesiland

Bixwîn rebbê te-j herkesî merdtire
Qenciya wî-j a her kesî bêtire

Ew Xwedayê bi qelemê me hîn kir
Tiştê însan nizanîbû pêş wî kir

Resûlûllah ketî tirs û heybete
Ji Hîrayê ber bi Mekkê dakete

Resûlûllah di go wer min binuxmîn
Tevde laşê wî ji tirsa lerizîn

Ez ditirsim wer serê min xerab rewş
Xedîce go mizgîn li te bib dilgeş

Rebbê ‘alem nake rûreş te tucar
Lew tu-j bona kesê bindest alîkar

Serpêhatî jêre gotî yek bi yek
Xedîce lê bû guhdarî pir gelek

Paşî ew bir cem Wereqê Newfel e
Pir haydar bû ew ji ‘ilmê Încîl e

Resûlûllah jêr digotî rewşa xwe
Lê bû guhdar ew bi qelbû guhê xwe

Wereqe go sûnd dixum ev namûsa
Cebraîl e, Xwedê ew şand cem Mûsa

Xwezya ku ez xortbama di de’wa te
Minê bê hed alîkarî bida te

Hem sağbûma dema ku wê te derxin
Resûlûllah go qey ewê min derxin

Wereqe go kî bi vê wek de’wa te
Hatibe nav kîjan qewm û welate

Gelê wî jêr bûne dujmin hem neyar
Ew derxistin ji welat û cî yû war

Selam li ser enbiyayê pir kîram
Ji Xwedê re ew mûti’ bûn bûne ram

Te heq nas kir te heq gotî Wereqe
Dîtina te ji mer bûye meraq e

Tu li pût û li senema hat ğezeb
Fitreta pak dînê henîf kir mezheb

Rehma Xwedê li Wereqê Newfelî
Wî xwe parast ji wê şîrka esfelî

Ger dixwazin hûn ji agir bin berat
Ji can û dil hûn bibêjin esselat.

*****

Di çelî de anî wehya pak delal
Cibrîl ji cem wî Xaliqê Zulcelal

Nûr bariya wek barana nîsanê
Şu’le daye ser temamê cîhanê

Ji qefesa azad bûne teyrê baz
Ew gihaştin armanca xwe serfîraz

Cebraîl go tu resûlî bi rastî
Rebbê ‘alem te şandiye-b qasidî

Berî her kes bawer kirye Xedîce
Îman anî wê bi Rebbê Mecîd e

Îman anî Ebû Bekir, Zeyd, ‘Elî
Serfîraz bûn ji Xwedê re bûn welî

Piştî wehyê mumina sê sal temam
Ne digotin Îslam li nav xas û ‘am

Wan bi dizî teblîğ kirin bê guman
Di van sala çel heb dibûn musluman

Rab bitirsîn bi ayetê ferman hat
Eşkere kir muslumantî-l nav welat

Resûlûllah go rehetîw xew nema
Hat zemanê êş û derd û elema

Pêxembertî ne karekî heneke
Barkî giran vê nîqaşê qet neke

Resûlûllah rojkê bi lez ji sibê
Hilkişiya ser wî girê cem Ke’bê

Bi dengê hêl bi xêrxwazî ji Sefa
Ban bavik û ban ‘eşîra kir teva

‘Eşîr bavik li wê derê civiyan
Jê re gotin derdê xwe bik daxuyan

Wî digotî ji paş çiyê bêjim ez
Wextî dujmin êrîşî we bik bi lez

Kî yê ji we baweriyê pê bîne
Wan digotin tu Muhemmed Emîn e

Resûlûllah go werin guh bidne min
We-d tirsînim ji ‘ezabê pir mezin

Ew ‘ezabê roja tirs û heybetê
Ê dest vala wê bikşîne hesretê

Ebû Leheb dîn û har bû ew li wir
Wî-b zimanê xwe heqaret pir lê kir

Ya Muhemmed te kişandin kul û derd
Xwedê zane bê jimar û bê ‘eded

Ya Mûhemmed tu rehmeta ser cîhan
Bi te azad bûne cinn û hem însan

Ger dixwazin hûn ji agir bin berat
Ji can û dil hûn bibêjin esselat

********

Îslam wek ba bela bûyel hawîrdor
Lê muşrika li wan kirin zulm û zor

Roj bi rojê zêde dibû zulma wan
Musluman jî bûne ğemgîn bargiran

Ezyet dîtin kolew bindest hem feqîr
Bi taybetî ê ğerîb û bê ‘eşîr

Resûlûllah go herin Hebeşîstan
Xelas bibin ji zulma pûtperestan

Serokekî baş heye l-wî welatî
Li wir tune zor û zulm û koletî

Hîcret kirin ew çûne cem Necaşî
Wan hewandin bi camêrîw dilxweşî

Duheb qasid Qureyşiya ew şandin
Da muhacir ji wir bêne qewrandin

Qasidê wan gihaştin wir bi lezî
Bertîl dane keşeyên wan bi dizî

Necaşî jî herdû teref wî civand
Cafer lawê Ebû Talib peyivand

Cafer xwendî sûrê Meryem ji serî
Temamê wan bê deng bûne guhdarî

Necaşî yû meclîsa xwe wan teva
Xwe ne girtin hêsir hatin ji çava

Necaşî go Quran, Încîla Mesîh
Ji yek cî tên bi zimankî pir fesîh

Piştî vêya wî qasidên Qureyşî
Qewirandin bi poşmanîw rûreşî

Em Necaşî bi rehmetê yad bikin
Qenciya wî em tucarî j-bîr nekin

Ger dixwazin hûn ji agir bin berat
Ji can û dil hûn bibêjin esselat.

Di debarê nivîskar de

Têhev

5

Gotar

Ê Berê JI SÎYERA PÊXEMBER
Ê Li Pey JI SÎYERA NEBÎ

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.