HİRİ MESELAYİ U HİRİ DERSİ

Article

   DI MERDIMİ KESLANİ 

  Wextan ra wextêk yo welat dı dı hebi keslani esti bi. Ini keslani, çırê nêxebıtiyeni. Keye u merdımi inan se keni nêkeni nêeşkeni pê inan yo gure bıdi kerdış u nê zi eşkêni ıni wırdinan cayê xu ra bıleqni. Yo ruec, dı rueci, hiri rueci… Onyeni ıno hına nêbeno, şini verê padişahi. Ey ra voni:

- Dı hebi merdumi ma esti zaf keslan i. Keslani inan dı biya yo kurm. Ma se kêni nêkeni ma nêeşkêni yın cayê xu ra bıleqn u warezn. Inay ser padişah vono:

- Ê wırdi merdıman biyarên yo raşte dı runışnên, dıma kueliyan bıdên ari u dorê inan dı bikerên pisêr! Dıma ay kueliyan tafınên. Ê wırdi merdumi, mıheqeq vercu germiya kıla adıri ra xu leqnêni, dıma bınêna bıbo germ, ê a germi ver wırzêni u remêni. Şıma zı hıni yin ra xelısiyêni. Şarê ê şaristani, şıni u vateyê padişahi ani ca.

Şar, ê wırdi merduman depışeno u ani raşteyê suk dı runışneno. Kueliyan doni ari, adır fineni ta u hıni onyeni se bêno. Kıl kona kueliyan u heme veyşêni. Ê ki hê doru verê adıri dı tonê adıri ra xu dur depışêni. Labelê ğemê ê wırdi keslanan nêyo, xu qet nêleqnêni. Çı wext tonê adıri dona inan, hema newe inan ra yo vono:

- Ez vono qey ita bınêk biyo germ, tı zi hına nêvoni? O bin zi vono:

- Eroo, tı seni eşkayi qısêbıkêri!!

***

 

   MA SEKER INA DINYA FANİ YA 

  Ruecêk rayıra yo merdımi kuwena yo dew. Ino merdım, wext ki dew ra beno nızd eg çı bıvino! Yo cini ha pê lınganê xu çiyêk alewena, pê destanê xu çiyêk wırazena, paştê xu dı çiyêk şona ti u fekê xu dı zi çiyêk wunena... Ino merdum eceb monên u ıno halê a cini ay ra perseno:

- Ya cini o çıto tı ha alewena? Cinêk vona:

- Ino mir o, cirananê mı da wo ez ha inan ri alewena. Ma seker ına dınya fani ya!

- La, o çıto tı ha wırazena?

- Ino sueter o, cirananê mı da wo ez ha inan ri wırazena. Ma seker ına dınya fani ya!

-  La, a çıta wa ha paştê tu da u tı şona ti?

- A zi meşk a, ez qey cirananê xu du şona ti. Ma seker ına dınya fani ya!

- La, o çıto tı ha wunena?

- Çend hebi Yasin i! Ez qey merdanê cirananê xu wunena. Ma seker ına dınya fani ya!

Ini cewaban ser ıno merdum, hıni marazdar beno u beno de u daymış nêbeno vono:

- Cini cini! Ina dınya fani ya tı êndek gureyan têca dı kena, eg ına dınya fani nêbên Homa zono tı se kerdên!!!

***

 

 DARA TELEYİ 

Ruecêk yo merdım, verê keyeyê xu dı kışta rayır dı tele nono ru. İnsani a mıntıqayi her ruec a rayır ra yeni şini. Ê insani ıno merdım ra voni:

-  Ya merdum! Tı ına leya teleyin ita dı nawa ru; labelê insani tera beni ecız u sıba biyor ına ley hem zırar dona tu hem zi dona insanan.

Ino mêrik, vono:

-  Şıma ver mekuwerê u meraq mekerê! Ez yo merdımo xuert u tern o. Mı çı wext di, ına ley biya dar u zırar dona insanan ez o wext ay rıstımê ay ra qerifneno u erzeno.

Ruec, ruec ser şıno u aşm, aşm erzena xu dıma: Beynate ra çend serri şini dara teleyi bena gırd u derg. Ino merdım zi ınay vineno; labelê qet xu ecız nêkeno, xu cayê xu ra nêleqneno. Ino beynatê insani rına çend dori tera voni:

-  Ya merdum! Ma çend dor tu ra va; tı ına leya teleyin ita dı nawa ru; bıbırn! Tı nêbırna bıon sebiyo ına dar biya xışn u hini zırar dona ma u ma nêeşkeni ına rayır ra şiyero.

Ino merdım, rına pê qureti vono:

-  Şıma meraq mekerên, ez ay zereyê çend ruecan dı rıstımê ay ra onceno.

Labelê, beynate ra çend rueci viyereni ıno mêrik rına zey xu keno. Qala insanan pêy gueş keno. Hına hına zaf serri viyereni u dara teleyın her ca gena. Rayır war verdên hıni kes nêeşkeno dorê ê tele ra şiyero. Ino merdım zi hıni biyo extiyar u biyo kuz. Xu xu vono, ez hıni şiyeri a dar bıbırni u kuekê ay ra qelbıdi; labelê mêrik seni’g hetê a dara teleyin ra şıno tele ey geni u leşa ey miyonê guni dı monena.

Eg kom, guneyan u xetayan xu ra tobe nêkero vera vera tobeyê xu bıtexırno eynen zey ıni misali ruecêk yeno ê guna u xetayi qelbi ey keni siya u hıni nêeşkeno tobe zi bikero!

Di debarê nivîskar de

Têhev

11

Gotar

Ê Berê INA Zİ VİYERENA
Ê Li Pey KUTIKO ZEĞER

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.