JI SÎYERA PÊXEMBER

Article


Piştî Îsa sala pênsed heftêw yek
Ebrehe hat rêzkir êsker yek bi yek

Wê xerake Ke’ba Şerîf ev dixwest
Rebbê ‘alem wî ceza kir dest bi dest

Ji ‘ezmana Xwedê teyrê ebabîl
Şandî ser wan pêşya esker hebûn fîl

Kevrê agir bi ser wan de bariyan
Ew kirin wek pûş û palax ariyan

Ser nuxûn bûn eskerê wan reviyan
Ehlê Mekkê man heyirî ey ciwan

Xwedê Kâbe hemandiye j-dujminan
Ew dujminê bê însaf û bê ûjdan

Di vê salê nûra dila welidî
Nûrek taybet kesî mislê wî nedî

Bi mîladî tarîx bîstê nîsanê
Destê sibê Mûhemmed hat cîhanê

Meha rebî ya êwilî j-duwazda
Şeva duşem wextê seher Xwedê da

Da ser cîhan şewqa nûra Ehmedî
Da me xilat ew Xwedayê sermedî

Bi çêbûna Hebîbullah pir xweşin
Çav bi kenin rû vekirî dilgeşin

Ey Mûhemmed tu ser serû çava hat
Tarîtî çû ser cîhanê roj hilat

Her çi dema aşiq wesfê te bejin
Ew xwe nagrin hêsrê çava dirêjin

Min bi peyvê Mûhemmed nepesinand
Gotina xwe bi navê wî xemiland

Ger dixwazin hûn ji agir bin berat
Ji canû dil hûn bibêjin esselat

*****

Ya mûhemmed tu yî fexra cîhanê
Hem jî xwedyê mu’cîzat û Qur’anê

Bi nûra te ronî bûye şeva reş
Dil birîndar dilbikul pê bûne xweş

Tu mizgîna feqîr û hem ‘asiya
Bi nûra te rû sipî bûn rûsiya

Piştî serma zivistana pir giran
Hatina te bû mizgîna biharan

Buhara dil bi şewqa te xemilî
Buhar şîn bû gul û nêrgiz kemilî

Bulbul xwendî teyra mizgîn dane hev
Şeytan ta girt ji tirsa ra ketin tev

Evîndar û aşiq civyan li cem hev
Bi zimanê halê mizgîn dane hev

Hat qasidek ji cem Rebbê ‘alemê
Bindest bi wî xelas bûne j-elemê

Hat Mûhemmed mizgîndanê ser zemîn
Hat Mûhemmed pêxemberê nazenîn

Mizgîn hatî pêxemberê xwedî soz
Wî li dunyê exlaqê baş kirye doz

Hat mûhemmed mizgîndanê ummetê
Nûra çava pêxemberê rehmetê

Wehî daket ji bona me bû delîl
Pût û senem ehlê şirkê bûn zelîl

Tîrêjê wê li cîhanê şu’le da
Hat Mûhemmed ji pûta ra elweda

Bi hezara bi milyona Rebbena
Ji te re bin pesn û hemd û hem sena

Em nikarin wesfa bêjin bi teva
Neb ziman û neb qelem û neb deva

Em rûreşin gunehkarin bê meded
Mezin biçûk gunehê me bê ‘eded

Ya Reb hatin ber deryê te gunehkar
Dilşikestî bi poşmanî zari zar

Ji ber derî ya Reb me neqewrîne
Belengazin ya Reb me neheyrîne

Em vê zanin ji mer tune hîlew çar
Ma nej te be wê kî li me bik sitar

Ya Subhanû kî were dergahê te
Tobedar û hêvîdarê rehma te

Ew tucarî nabe mehrûm poşîman
Tu Tewwabî hem Rehîm û dilovan

Ya Reb rehmê l-mumina ke berdewam
Gunehkarê tobedar û xasû ‘am

Ger dixwazin hûn ji agir bin berat
Ji canû dil hûn bibêjin esselat

 

 

Di debarê nivîskar de

Têhev

3

Gotar

Ê Berê EY BULBUL
Ê Li Pey JI SÎYERA PÊXEMBER

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.