MA ÇI MA?

Article

Xweda j-tuneyî çêkir
Feleka  bêqûsûr ma
Ji afirandina bi sirr
Alem tev heyirî ma

Çerxa felekê fitilî
Dîrokek biğemgin ma
Gelek tişt têd sebiqî
Mîratek bê xwedî ma

Di piştî fecra sadiq
Şeveqa derewîn ma
Piştî sitêrka bişewq
Çirûska bêronî ma

Ji weswesa îblîsî
Ji Adem ra nefî ma
Ji Ademê dilzîzî
Qabîlê birakuj ma

Ji înata kuffarî
Nifira Nebî Nûh ma
Ji keştîya Nebî Nûh
Çend textikê rizî ma

Pey Eyûbê birîndar
Sebra li ser sebra ma
Di bin bîra tarî da
Ew Yusûfê Ye’qûb ma

Ji  bavê me Îbrahîm
Baxê gul û rihan ma
Ji Nemrûdê zilimkar
Agir û mencenîq ma

Ji Mûsaw bira Harûn
Deh şîretên qewî ma
Ji Fir’ewnê pir mel’ûn
Cesedekî delîl ma

Ji ‘Îsa kurê Meryem
Mizgînîyek şêrîn ma
Ji nezanên di dûra
Xaçeke reqî rût ma

Ji Mûhemmed Mistefa
Hezkirinek mezin ma
Di piştî çûna emîn
Sunnet û hem Qur’an ma

Piştî ku Siddîq çûye
Ji me re xiyanet ma
Piştî ku Farûq çûye
Ji me ra zilmetî ma

Piştî zînnûreyn çûye
Ji me re bêfedî ma
Piştî ku Kerrar çûye
Ji me ra cehalet ma

Li Kerbela Huseyîn
Qêrîna Zeyneba ma
Li ser Yezîdê xayîn
Le’neta heqyezdan ma

Ka Selheddîn Eyyûbî
Di pîştî wî re çi ma
Ew warê wî azad kir
Ji hicûma xaçar ma

Di piştî ewan mêra
Tirseke bêdawî ma
Em hew dibînin şêra
Rovî li meydanê ma

L-dû vê dewlemendîyê
Ji me re xizanî ma
Piştî ‘ilm û edebê
Ji me re nezanî ma

Ji gulistana rengîn
Çend gulê sitûxwar ma
Li zozanê bilbila
Îro dengê kunda ma

Ji axa Mislimana
Sed perçê birîndar ma
Ji bê şer û bê olar
Îro kêf û seyran ma

Piştî çand û hunera
Bêjeyek bêqîmet ma
Heyfa mercan û dirra
Bêkes û bêxwedî ma

Çi xeyala xweş şêrin
Îro tevde nîvçe ma
Ew helbesta bi evîn
Ka îro ji kê re ma

Ji ber vê sertewîne
Ne ğîret ma ne mal ma
Enfal û talan rabûn
Ne ‘erz û ne ‘îyal ma

Ketne deryak bêbinî
Ne behn heye ne qam ma
Em bûne xurê xelkê
Ne maf ma ne eman ma

Ez dibêm ezê bangkim
Ne deng û ne awaz ma
Min helbestek nihirand
Ne miqam ma ne saz ma

Pirbûn kolê hemdemî
Ka azadî li ku ma
Aşîtîxwaz bi virrî
Kanî kevok li ku ma

Bûn keleka ber pêla
Ne şop ma ne rêger ma
Em bi sere xwe mane
Ne serok ne rêber ma

Çîyayê herî bilind
Bê daristan û seyd ma
Kanî çemê Zirganê
Bêav û bêmasî ma

Cilê me bûn ewrûpî
Ne şal ma ne şapik ma
Şefqe danîn sersera
Ne cubbe ne şaşik ma

Moda ket nav gelê me
Bêyî nuxumandin ma
Me wa nedî j-kalê xwe
Ne heyaw ne fedî ma

Mar ketî nav mirova
Pirsîyan û rehm nema
Hesûdî ket nav dila
Bexîlîw nebaşî ma

Îro xwarin pir bûne
Ne hevrêşk û sindik ma
Însanê îro bitr in
Ne besmelew şikir ma

Ev dem pere bûye mîr
Qedrê zilama nema
Zilamtiya bi pera
Ji xelkêr temaşe ma

Dem herikî çû bi lez
Ne jîrik ma ne mîr ma
Her yek dibê ez û ez
Ne qewm û ne ‘eşîr ma

Bav û bapîrê me çûn
Kanî pêşîyê kê ma
Em man yetîm û sêwî
Ne bav ma û ne dê ma

Weşîn pelê jiyanê
Ne gul û ne sosin ma
Goyîn ketin wîyanê
Ne beybûn ne rihan ma

Dem dema bayê kure
Şên û sitarî nema
Bihara umra dûr e
Rê dûr e taqet nema

Ji xwe re dibêjim ez
Kacî jî çû ka çi ma
Heyfa ewan mêrxasa
Kesek li dû wan nema

Te sîw pênc sal derbas kir
Kanî umrê te çi ma
Dinya xanek xerab e
Kanî ew ji kê re ma

Dibên dinya sê roj e
Sibê dûre doh nema
Roj ew e ku yek roj e
Ew dema ku têda ma

Ka xwedyê mal û milka
Kanî ji wan ra çi ma
Serwet û zêr û meqam
Kefenek bêberîk ma

Ji ehlê delaletêr
Ev dinyaya fanî ma
Ji bo ehlê îmanê
Axreta bêdawi ma

Di debarê nivîskar de

Têhev

6

Gotar

Ezîz Mezraqenterî

Ê Berê KANÎ ÎRO ÇIB ME HAT
Ê Li Pey

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.