Qena‘et

Qena‘et

Ji Pendnameya Ferîdûddîn Attar - Werger: Şeyhmus Orkin

 

Her çi qas ji feqîrtîyê tehltir tiştekî tune be jî

Tu bi qene‘et be her dem lawiko

 

Di her wextê seherê de rabe û tobe bike

Ev fersenda ku di destê te de ye bikarbîne

 

Xîbeta dost û cîranên xwe neke

Ji xeyrê şeytên li tu kesî le‘net neke

 

Ji bo her roja nû ku li alemê vebû

Divê ku tu ji gunehan birevî û tobe bikî

 

Her çi kesê ku ji Xweda netirse

Xweda, wî ji her tiştî dide tirsandin

 

Heta dikarî hewcehîya miskînan biqedîne

Da ku Xweda jî hewcehîyên te biqedîne

 

Hemû malên di destê te de ne emanet in

Ku di destê te de bimînin di axiretê fîzar dikî

 

Divê ku tu emanetê teslîm bikî

Te qet dîtîye kesekî ku li cem xwe zêr birîye?[1]

 

Ji dinyayê çi dimîne ey kesê emîn

Neh zîra’ qumaş û du sê qemç ax!

 

Te her çi di rêya Xweda de dabe ew e malê te

Kesên ku bi rizqê hindik razî bin, lutf û kerema Xweda dibînin

 

Dinya mîna mirarê genî ye

Ger ku tu mêrxas î dev ji wê berde

 

Dinya mîna dilopek e

Ger tu xêra xwe dixwazî tê bibuhre

 

Her çi kesê ku li ser pirê xanî ava bike

Bi wî re aqil tune ew ji dînan ye

 

Mu’min ku ji Xweda mal û milk bixwaze

Lewra ji bo mu’minan dewlemendî zehmet û derd e

 

Feqîrtî û derwêşî sefaya mu’mina ye

Ji bo ku hundirê wan bi vê şad dibe

 

Mal û ewladên te, li ber çavê te mîna ronîyê be jî

Ew di heqîqetê de dijmin in

 

Înnema ewladûkûm[2] bibîr bîne

Mahîyeta mal û milkên vê cîhanê hîn bibe

 

Ji bo ehlê Xweda faydeya mal û milkên dinyayê tune ye

Tu car fikra tunebûnê li cem wan tune ye

 

Her kî xwedîyê dilê pak û sadiq be

Ji bo wî loqmeyek nan û xirqeyek bes e

 

Kesê ku li pêy zêdekirina malê be

Ji ehlê se‘adetê dûr dimîne

 

‘Evdên Xweda di vê rêyê de canê xwe bexşandine

Hespê himmetê heta stêrka sureyya birine

 

Heta tu di rêya Heq de ji her tiştê neborî

Meqseda ku ji bo te divê, çawa bi dest dikeve?     

 



[1] Behsa mirinê û fanîbûna malên dinyayê tê kirin. Tu kesekî piştî mirinê nikare bi xwe re mal û milk bibe.

[2] Bi rastî malên we û zaroyên we ji bo we îmtihan in. Xelata mezin jî li cem Xwedê ye. -Sûreta Teğabûn ayeta 15.


Ê Berê Divê em perwerdehiya Îslamî bidin xortan
Ê Li Pey Weqfa Yetîman li Ugandayê fealîyetên xwe yên alîkarîyê didomîne

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.